Beint í efni

LFÍ ber kveðju til Ingunnar

25. ágúst 2023

Ingunn kennir við Háskólann í Osló.
Ingunn kennir við Háskólann í Osló.VÍSIR

LFÍ ber kveðju til Ingunnar Björnsdóttur sem varð fyrir því hræðilegu atviki að verða stungin af nemanda sínum í Osló í gær og liggur á spítala þar sem hlúið er að henni.

Frétt þessi ásamt mynd var tekin af síðu vísis https://www.visir.is/g/20232454413d/ingunn-su-sem-var-stungin-af-nemanda-sinum

Ingunn Björnsdóttir, dósent í lyfjafræði við Oslóarháskóla, var ásamt samkennara sínum stungin af nemanda í gær. Nemandinn hefur verið handtekinn.

Greint var frá því í gær að nemandi í Háskólanum í Osló sé grunaður um að hafa stungið tvo kennara sína með hníf í húsakynnum skólans síðdegis í gær. Annar kennaranna hafi verið fluttur alvarlega særður á sjúkrahús.

Ingunn deildi í morgun mynd af sér í sjúkrarúmi undir yfirskriftinni „Heyri að íslensku fjölmiðlarnir séu að skrifa um þetta.“ Hún baðst undan viðtali vegna árásarinnar.

Í frétt NRK um málið segir að nemandinn, sem er á þrítugsaldri, hafi verið handtekinn vegna málsins. Haft er eftir verjanda hans að hann neiti alfarið sök í málinu.

Samkvæmt upplýsingum lögreglu hlutu bæði Ingunn og samkennarinn stungusár í árásinni en tveir hnífar fundust á vettvangi.

Tor Gulbrandsen hjá lögreglunni í Osló segir í samtali við NRK að ljóst sé að nemandinn hafi þekkt kennarana tvo. Hann hafi verið yfirbugaður af fólki sem varð vitni að árásinni inni í skólanum.

„Hnífi var beitt. Maðurinn var rólegur þegar lögreglu bar að garði,“ er haft eftir Gulbrandsen.

Rektor háskólans segir árásina sorglega og alvarlega. Nemendum og starfsfólki skólans hafi þegar verið boðin áfallahjálp.

Dagsetning
25. ágúst 2023
Deila